|
Ontdek: die heel kleinste slangetjie op aarde
Y SAL dit maklik aansien vir ’n blink erdwurm, maar dis allesbehalwe een van daardie wriemelende wurmpies wat jou tuingrond so vrugbaar maak. Waarna jy kyk, is 'n slangetjie—die kleinste een op aarde. Dié blinde, nie-giftige dingetjie is in ’n woud op die Karibiese eiland Barbados ontdek. Hierdie klein reptiel is slegs 10 cm lank, en wetenskaplikes het dit geëien as ’n nuwe draadslangspesie, een van ’n familie van grawende slange wat in Afrika, Asië en die Amerikas voorkom. Die Amerikaanse bioloog dr. Blair Hedges, wat die ontdekking gedoen het, het vasgestel dat dit kleinste van 3100 slangspesies is wat aan die mens bekend is.
Dr. Hedges, van die Pennsylvania State University, het die slangetjie Leptotyphlops carlae genoem, ter ere van sy vrou, Carla Ann Hass, ’n herpetoloog wat deel van die span was. ('n Herpetoloog is iemand wat kruipende diere bestudeer.) Daar word gemeen dat Leptotyphlops carlae, soos sy familielede, hoofsaaklik van die larwes van miere en termiete leef. Wat die slangetjie ook besonderlik maak, is dat die eier wat die wyfie lê so enorm groot is in vergelyking met haar eie liggaampie. Sy lê dan ook net een eier op 'n keer, in teenstelling met sekere ander slange wat tot 100 eiers vir ’n enkele broeisel kan deponeer. Die kleintjie wat uit die eier kom, is reeds sowat
die helfte van die lengte van ’n volwassene, terwyl die pas
uitgebroeide kleintjies van die grootste slange maar net ’n tiende
van ’n volwassene se lengte het.
|
|