Ons wêreld en sy wonders

Enkele interessante beelde van die aarde, sy bewoners en die onmeetlike ruimte daarbuite

Vliegtuig breek deur klankgrens

LINKS: Dis ’n alledaagse gebeurtenis, maar dit was sensasionele nuus toe dit ’n tyd gelede op film vasgelê is. Vir die eerste keer sedert die mens met sy vliegtuie deur die klankgrens gebreek het, kon ons naamlik ’n foto sien wat só ’n oomblik verewig. ’n F-18 Hornet van die Amerikaanse vliegdekskip USS Constellation bereik êrens oor die Atlantiese Oseaan die bepaalde snelheid waar hy vir klank begin wegvlieg (1123 km/h by standaard- atmosferiese toestande). Só ’n deurbraak veroorsaak ’n blitsvinnige kondensasie van waterdamp, wat in die reël tog nog onsigbaar bly. In hierdie geval was die weerstoestande  egter ideaal vir die vorming van ’n sigbare wolk—’n skouspel wat op net die regte oomblik gefotografeer is.

’n Lens in die hemelruim

REGS: Die wentelende ruimteteleskoop Hubble het in sy dienstyd van sowat anderhalwe dekade wonderlike foto's van die ruimte na die aarde teruggesein—en ons kennis van die stoflike heelal ontsaglik verbreed. Hier is een van die foto's wat groot belangstelling gaande gemaak het—dié van ’n reusagtige kosmiese ''vergrootglas'' wat die teleskoop waargeneem het. Dit is ’n ontsaglike tros sterrestelsels wat Abell 2218 genoem word. Die tros is so massief dat sy enorme swaarteveld ligstrale deflekteer wat daardeur beweeg, baie soos ’n optiese lens wat lig verbuig om ’n beeld te vorm.  

 —NASA / Hubble Heritage Team

Gehoring en gebek

REGS: ’n Lid van die skaarsste renostersoort op aarde word deur ’n  kamera betrap. Wetenskaplikes het bereken dat daar maar net sowat sestig Java-renosters oor is. Dié diere is so skugter dat baie kenners tot 1988 gemeen het hulle het uitgesterf, totdat ’n jagter in hegtenis geneem is toe hy die vel en horing van só ’n  renoster probeer verkoop het. Ietwat meer volop, maar steeds so gesog dat die dieretuin van Tokio na bewering reeds tien miljoene rande vir net een aangebied het, is die geroemde eendbekdier van  Australië. Die Australiese regering verbied egter eendbekdiere se uitvoer. Hulle  teel ook nie maklik in gevangenskap aan nie, hoewel ’n natuurliefhebber darem reeds ’n klompie in sy wildpark kon teel, soos die kleintjie op die samegestelde foto LINKS.
Kyk net hoe lyk so ’n bekkige gedroggie! 

Grootste skeur in die sonnestelsel

REGS: Gedink die Grand Canyon in Arizona, Amerika, is yslik groot? Wel, die grootste canyon in die sonnestelsel laat hom behoorlik na ’n vulletjie lyk. Die sogenaamde Valles Marineris van die planeet Mars is ’n ontsaglike 3000 kilometer lank, tot 600 kilometer breed en soveel as 8 kilometer diep. Vergelyk dit met die Grand Canyon wat "net" 800 kilometer lank, 30 kilometer breed en 1,8 kilometer diep is. En hierdie reusagtige skeur in die kors van Mars is maar een van die Rooi Planeet se baie geheime wat nog ontrafel moet word. Dit lyk of hy in sy verlede warm en waterryk was, teenoor die ysige koue en dorheid wat vandag daar heers. Maar waar is al die water dan heen? Was daar eenmaal lewe? Mars is inderdaad die volgende kosmiese uitdaging vir die ondersoekende mens met sy onversadigbare sug na  kennis.

ONDER is ’n nabyfoto van die ontsettende verlatenheid van ’n deel van die Valles Marineris.

Foto’s bo: NASA, USGS

’n Vergelyking met die Grand Canyon in Arizona (HIERONDER) is interessant.

Foto bo: US National Park Service

Klik hier om terug te keer na die inhoudsblad