Wit olifantVerkoop al daardie orige  wit olifante  in jou huis—kenner deel sy beproefde wenke met alle Mieliestronk-lesers
    
Maak só rande
uit jou rommel!

LEO KRITZINGER, skrywer van bekende boeke met allerhande wenke vir selfdoeners, gee spesiale raad aan almal wat wil weet hoe hulle lekker geld kan maak met vlooimarkte en garage-verkopings... 

Hou jou eie garage-verkoping
 
VIR die meeste mense is ’n garage nie net ’n plek waar die motor geparkeer word nie—dis ook die begraafplaas vir al die huishoudelike items wat nie meer gebruik word nie, stukkend is of gewoon oudmodies geword het. Daar sal jy ’n uitgediende broodrooster, Kleinbboet se treinstel, ’n afgeleefde trapfiets en ’n boks vol ou kombuisware vind. Dalk is jou motorhuis al so vol, daar's kwalik plek vir die motor!

Dan is dit hoog tyd dat jy jou eie garage-verkoping reël. Omskep die onnodige goed wat jou plek en jou lewe oorlaai in lekker harde kontant.

Want wat vir jou net gemors is, is vir ’n ander ’n kosbare vonds. Hier is ’n paar nuttige wenke om jou te help om jou eie garage-verkoping te reel:

 
1. Maak ’n lys van alles wat jy wil verkoop. Gaan alles na—kyk of elektriese apparate of jou kraggereedskap nog werk.
 
2. Merk pryse op alles. Kopers wil nie heeltyd vra wat ’n item kos nie. Wees bereid om met voornemende kopers te onderhandel.
 
3. Maak kleurryke A-4-plakkate en plaas hulle op kafees en jou plaaslike biblioteek se kennisgewingsborde. Dui die datum, adres en tyd duidelik aan. Jy kan ook ’n opsomming van die meer waardevolle items daarop noem.
 
4. Maak ’n groot plakkaat of banier met die woord 'GARAGE-VERKOPING' en die datum daarop. ’n Banier kan sommer van ’n ou somerlaken gemaak word. Maak dit ten minste ’n week voor die tyd op ’n prominente plek teen jou huis vas.
 
5. Kry genoeg opslaantafels om jou ware op uit te stal.
 
6. Sulke verkopings word tradisioneel garage-verkopings genoem, maar moet dit nie letterlik in jou garage hou nie. Jy wil nie voornemende inbrekers die kans gee om jou plek te bespied nie. Hou dit buite of onder jou motorafdak.
 
7. Sorg dat alle ware skoon is—dit skep ’n beter indruk en sal jou meer in die sak bring.
 
8. Kry jou tafels vroegoggend gereed sodat jy die eerste kopers dadelik kan bedien.
 
9. Wees altyd bedag op mense met lang vingers— hou jou ware fyn dop.
 
10. Vir veiligheid, hou jou geld in ’n moonbag wat jy om jou middellyf kan vasgord.
 
11. Maak seker dat jy kleingeld en ou inkopiesakkies byderhand het.
 
12. Betrek die hele gesin. Kleinboet kan ’n speelgoedtafel beman, terwyl Ma weer haar eie tafel met kombuisware kan organiseer.
 
13. Dis ook ’n gulde geleentheid om tuisgemaakte fudge, koekies, beskuit, pannekoek, groetekaartjies of houtspeelgoed te verkoop.
 
14. Onthou om ook die nuus onder vriende en familie te versprei.

  
Vlooimark-
voorbereidings

AS jy opgeskeep sit met ’n klomp onnodige dinge in jou huis—ou kombuisware, boeke, ornamente, juwele, langspeelplate, noem maar op—is dit dalk tyd om te dink aan ’n tafel by ’n vlooimark. Wat vir jou onbruikbaar geword het, is vir ’n ander net die ding wat hy soek—en boonop kan dit rande in jou sak beteken!

'n Vlooimark is 'n geldmaak-geleentheid -- as jy weet hoe om te werk te gaanVind uit wie die organiseerder  van jul plaaslike vlooimark is. Soms word dit privaat gereël, partykeer deur ’n kerkgemeente. Wees net bedag daarop dat daar ’n verskil is tussen ’n vlooimark (waar gebruikte goedere verkoop word) en ’n handwerkmark (craft market—waar tuisgemaakte ware van die hand gesit word). Handwerkmarkte laat baiekeer nie tweedehandse ware toe nie.

Hier is ’n paar wenke om jou vlooimarkdag glad te laat verloop:

 
1. Merk al die artikels vooraf. Kopers haat dit om gedurig navraag  oor pryse te doen. Gebruik vetkryt of skryf met ’n viltpen op maskeerband.
 
2. As jy wonder wat om vir ’n item te vra, vra jouself af wat jy bereid sal wees om daarvoor te betaal. Maar wees nietemin bereid om te onderhandel met voornemende kopers—die gekibbel oor pryse is deel van die vlooimark-kultuur.
 
3. Sorg dat jy vroegoggend opdaag en jou staanplek inrig. As die eerste kopers kom, moet jy gereed wees om hulle te bedien. Dan is daar nie tyd vir uitpak nie.
 
4. Moenie alleen gaan nie. Neem iemand saam—jou vrou, kind of ’n vriend. As jy wil wegglip toilet toe, kos gaan koop of self ’n draai deur die mark wil loop, dan het jy iemand wat die tafel kan beman.
 
5. Maak of koop vir jou ’n opvoutafel. ’n Ou binnedeur en twee opvou-bokkies is voldoende . Sommige vlooimarkte laat nie toe dat jy jou ware op die grond of op ’n seiltjie uitstal nie en vereis ook dat jou tafel heetemal met ’n doek bedek word .
 
6. Neem opvoustoele saam—dit kan ’n lang dag wees as jy heeltyd op jou voete moet staan.
 
7. Neem ’n sonhoed of sambreel saam—ná ’n paar uur in die bakkende son gaan dit voel asof jou brein kook! Sommige vlooimarkte dring aan op skadunet-gazebos, en laat nie strand- of sonsambrele toe nie.
 
8. Neem genoeg kleingeld saam.  As kopers groot note aan jou oorhandig, is daar nie dan tyd om vir kleingeld rond te skarrel nie.
 
9. Hou jou geld veilig aan jou lyf met ’n moonbag wat om jou middellyf vasmaak.
 
10. Onthou om ou inkopiesakke saam te neem, asook ou koerante om breekware in toe te draai.
 
11.Groepeer items wat saam hoort—boeke in een hoop, ornamente bymekaar, ens. Maak dit vir die koper maklik om te vind wat hy of sy soek.
 
12. Wees bedag daarop dat daar maar altyd mense met lang vingers is. Hou die ware op jou tafel goed dop.
 
13. Onthou ook dat baie munispaliteite die verkoop van gebruikte klerasie om gesondheidsredes verbied—vind eers uit wat die situasie in jou omgewing is.
 
14. As jy kraggereedskap of elektriese toebehore (wat nog werk) wil verkoop, gee die koper ’n kaartjie met jou naam en telefoonnommer as gemoedsrus. Wees bereid om sy geld terug te gee indien die apparaat nie werk nie.
 
15. Sorg dat die items wat jy verkoop, skoon en sindelik is. ’n Halfverslete motorband wat netjies skoongemaak is, sal jou meer in die sak bring as ’n besmeerde een. 
 
16. Die belangrikste is—geniet die uitstappie. Handeldryf op ’n vlooimark is groot pret, en jy ontmoet ook interessante mense daar.  Dis ’n heerlike manier om ’n Saterdagoggend deur te bring—en bowenal kom jy met ’n nuttige klompie ekstra rand in jou sak huis toe!                                                                              

Klik hier om terug te keer na die inhoudsblad