Die wêreld oor 20 jaar
— toekomsdroom of werklikheid?

Jou eie vliegtuig tuis...
Jou eie private vliegtuig wat sommerso by jou huis kan opstyg? Daar is mense wat reken so iets kan veel gouer ’n werklikheid word as wat baie van ons dink. Hoe ook al, talle geleerdes stem saam dat ons ’n tegnologiese omwenteling tegemoetgaan wat vinniger en ingrypender is as enige wat die mensdom nog beleef het. Hoeveel anders kan die wêreld straks oor ’n skamele twintig jaar lyk?

DIS sowat twintig jaar in die toekoms en jou krag is aan die afneem. Nie jou liggaamskrag nie, maar die krag in jou skoen se hak. Om die elektroniese opwekkers in die hak te laai, moet jy net weer ’n slag lekker vinnig om die blok loop

Dan kan die klein rekenaartjie wat jou hele lewe beheer weer optimaal aan die werk kom.

Die rekenaartjie sit weggesteek in die lyfband om jou middel, met sy ontsaglike geheue op hardeskywe geberg. Dié skywe is so groot soos kredietkaarte en sit binne-in jou skouer-kussinkies.

Boonop is die rekenaar per radio met die Internet verbind, en dit maak van jou ’n volwaardige burger van die sogenaamde wêrelddorpie (“global village”).

Jou internet-verbinding is egter ewe onopsigtelik. Versteek in ’n lapelknopie sit ’n piepklein mikrofoontjie wat jou met die res van die aardbol koppel, en deur spesiale lense voor jou oë sien jy letterlik die wêreld deur ’n nuwe bril. Dit is aan ’n uiters klein kameratjie gekoppel wat gedurig die omgewing waarneem waarin jy jou bevind.

Grafies voorgestel, sien ons hieronder hoe die “elektroniese jy” van die toekoms funksioneer:

Voorstelling van verskillende elektroniese komponente aan 'n mens se lyf

Maar presies hoe werk hierdie verskillende komponente van die volgende revolusie in die rekenaar-eeu waarvan prototipes al in Amerika ontwikkel is?

Of ons dit nou reg begryp of nie, ons gaan ’n tegnologiese omwenteling tegemoet wat vinniger en ingrypender is as enige wat die mensdom nog ooit beleef het . . .  

GESTEL byvoorbeeld jy is ’n Gautengse wetenskaplike wat ’n internasionale konferensie in die Kaap moet bywoon en jy merk ’n bekende tussen die konferensiegangers op, maar jy kan eenvoudig nie op die persoon se naam kom nie.

’n Oogwink later verskyn hierdie inligting aan die onderkant van jou bril: "Prof. dr. Koos van der Merwe D.Sc., D.Phil., briljante Suid-Afrikaanse uitgewekene van Hamburg, Duitsland, en ontdekker van die pil Remiehzla, wat in sommige gevalle Alzheimer kan genees. Getroud met Gizella Möhr, drie kinders. ’n Geesdriftige teler van herdershonde en lief vir sy potjie gholf en Chinese kos. Julle het mekaar op 6 Junie 2027 by ’n konferensie in Hongkong ontmoet.''

Die woorde op die mikroskermpie kan ewe goed gelees word as dié wat op ’n konvensionele rekenaarskerm verskyn.

Reeds 'n werklikheid -- die videofoonOf gestel jy is vir ’n naweek in Londen waar jy al die beroemdste plekke van dié wêreldstad besoek. ’n Stemmige stem in jou oor is jou gids en lewer kundige kommentaar oral waar jy aandoen. Op die koop toe beveel die stem ’n goeie restaurant aan waar jy vanaand kan eet en waar jy verder goeie vermaak vir die aand sal kry.

Of dalk is jy in Taiwan op ’n sakebesoek, maar jy kan, soos die meeste van ons, geen stomme woord Chinees praat nie. Tog wil jy die mense met wie jy gaan sake doen in Chinees groet net om hulle in ’n gemoedelike stemming te plaas. Al wat jy doen, is om in Afrikaans in die mikrofoontjie in jou lapelknopie te praat—en deur middel van die Internet word jou woorde oombliklik in Chinees vertaal.

Verbysterend? Inderdaad. Dit wat geleerdes vandag “draagbare intelligensie” noem, kan ’n toekoms beteken waarin selfs die Eskimo van Lapland, die Inboorling van Australië, die Argentyn van Patagonië en die Tibetaan van Tibet sonder enige probleme hoegenaamd elk in sy eie taal met mekaar sal kan gesels.

Dit behels ook:

•   Dat ’n mens oral op aarde oombliklik met wie ook al kontak sal kan maak, vinniger en makliker as selfs met enige van die kommunikasiemiddele wat ons vandag gebruik. Boodskappe sal egter ook gefiltreer kan word, sodat jy nie tydig en ontydig deur mense met onbenullige dinge lastig geval word nie.

•   Dit beteken verder dat, sê maar, die Suid-Afrikaanse reisiger in Timboektoe in gedurige verbinding met sy makelaar in Johannesburg kan bly om op die hoogte te bly van die jongste aandelepryse.

•   Dat dit onmoontlik sal wees om ’n vreemde stad en selfs in ’n vreemde land te verdwaal. Die kameratjie aan jou bril sal jou omgewing met die beelde op satellietfoto’s vergelyk en die stem in jou oor sal jou sagkens in die regte rigting lei.

'n  Mens kan net jou hande saamslaan as jy hoor hoe gesofistikeerd satellietfoto’s reeds besig is om te word.

Daar is reeds ’n swerm kommunikasiesatelliete wat in ’n teenoorgestelde rigting wentel as wat die aarde draai (en dus relatief tot ons planeet op dieselfde plek in die hemelruim bly). Daar gaan ’n tyd kom, word gesê, dat dit nie net moontlik sal wees om jou eie huis direk uit die ruimte te sien nie (soos nou deur middel van Google Earth, wat egter net vooraf opgeneemde beelde weergee), maar tot vandag se koerant wat op daardie einste oomblik op jou grasperk lê.

•   Verder beteken “draagbare intelligensie” dat selfs die klere watNano-robot -- geneeskragtige reisiger in die bloedstroom ons gaan dra, die stand van ons gesondheid sal kan monitor. Sensore in jou “knapklere’’ sal jou hartklop, bloeddruk en ligaamstemperatuur kan meet en ’n noodsein aan ’n noodhulpdiens uitstuur as jy byvoorbeeld op die punt is om ’n hartaanval te kry.

By die hospitaal kan jy dan met behulp van ander gevorderde tegnologiese middele in ’n  japtrap gesond gemaak word. Die dokter sal byvoorbeeld sogenaamde “nano-robotte’’—mikro-masjientjies—in jou bloedstroom instuur wat die cholesterol wegkerf wat besig is om jou are te verstop.

Dis maar net sekere van die verstommende verwagtinge vir ’n toekoms wat straks nog vreemder dinge kan oplewer as enigiets wat ons ooit in ons wildste drome kon voorsien het.

Klik hier om terug te keer na die inhoudsblad