Materiaal met vriendelike vergunning van die Gautrein-projek. Kyk skakels onderaan hierdie webblad. 

LAAT niemand daaroor twyfel nie—die Gautrein is ’n GOU trein!
Wel, eintlik is hy nog nie, maar wanneer hy oor ’n paar jaar in bedryf kom, gaan hy die afstand tussen Johannesburg en Pretoria in minder as 40 minute afblits. Plek-plek gaan hy soos ’n mol onder die aarde induik om dan weer onverdrote kop uit te steek en soos ’n koeël oor die landskap te pyl.

Vervoer in Gauteng—só glo die Gautrein se inisieerders—gaan nooit weer dieselfde wees nie.

Die provinsie Gauteng se nypende vervoerprobleme, met soveel pendelaars wat daagliks tussen die twee groot stede moet beweeg, het die provinsiale owerheid laat besluit dat hierdie multimiljoenrand-projek nie net geregverdig is nie, maar inderdaad noodsaaklik. Die sentrale regering het ook sy stempel volmondig op die voorgenome onderneming geplaas.

Die Gautrein kan die begin wees van ’n verwikkelde moltreinstelsel soos ’n mens dit in wêreldstede soos Londen, Parys en elders in die ontwikkelde wêreld aantref. Die plan is ook dat dit ’n prestige-vervoermiddel sal wees wat vir min ander hoef terug te staan. Die feit dat daar op die voorgestelde roete ’n aftakking is wat die trajek met die Johannesburgse Internasionale Lughawe sal verbind, maak die opwindende projek des te meer lewensvatbaar.

REGS: ’n Kaart van die voorgestelde roete.

Op die koop toe word gewikkel om die Gautrein betyds gereed te kry vir die groot stroom toeriste wat met die Wêreldbeker-sokkertoernooi in 2010 verwag word.

Die Gautrein sal natuurlik nie net een enkele passasierstrein wees nie, maar ’n vlytige gesin van verskillende luukse-treine wat deurlopend teen ongeveer 160 km/h of vinniger heen en weer sal beweeg. Hulle behoort in staat te wees om elke dag meer as 100 000 passiers te vervoer op die trajek van 80 km met sy altesame tien stasies. Die rit tussen die lughawe en Sandton-stasie sal minder as ’n kwartier duur.

Elke trein sal drie of vier passasierswaens hê. ’n Passierswa sal sitplek aan sowat tagtig passasiers kan verskaf, terwyl daar staanplek vir nog omtrent twintig sal wees.

Na vertel word, sal ’n ongehoorde sowat 260 000 beton-dwarsleêrs vervaardig moet word vir die spoor waarop die treine sal beweeg.

REGS: Die Gautrein maak sy verskyning vanuit ’n ondergrondse gedeelte van die roete.

Die Gautrein-projek word bestuur as deel van die Gautengse departement van finansies en ekonomiese sake se openbare-private vennootskapseenheid. Die projekleier is mnr. Jack van der Merwe, wat hom reeds as hoof- uitvoerende amptenaar van die Gautengse openbare vervoerdienste onderskei het.

Met ’n Van der Merwe aan die roer—skerts iemand nou die dag—kan hierdie onderneming mos nie anders as om skouspelagtig te slaag nie!

BO: In die luuksieuse passasierswa sal daar plek wees vir sowat honderd passasiers (tagtig sit- en twintig staanplekke).    .	BO: ’n Voorstelling van die Gautrein in volle vaart iewers tussen Pretoria en Johannesburg.
As jy internet-toegang het, klik hier vir volledige besonderhede oor die Gautrein op die projek se eie webwerf As jy internet-toegang het, klik hier vir die Gautrein-projek se baie interessante afdeling vir kinders
Opdatering, Julie 2008 BO en ONDER: Daar word fluks gevorder met die Gauteng-projek, soos hierdie twee foto’s uit die projek se webwerf kan getuig. Bo staan projekbaas Jack van der Merwe en projekkoördineerder Olaus van Zyl  by die eerste treinstel wat in Julie 2008 deur Gauteng se premier, Mbhazima Shi­lowa, in Derby in Brittanje in ontvangs geneem is. Onder is slegs een van die verskillende plekke in Gauteng waar die Gautrein se pad doelgerig uitgegrawe en oopgetonnel word.

Klik hier om terug te keer na die inhoudsblad