Grond met erdwurms plus hoofopskrif: Erdwurms — Die aardige ploeërs wat volmaak in die aarde aard

Verwaande mens, jy’t gedog jy is baie slim toe jy die ploeg uitgevind het. Gaan na die erdwurm en kyk hoe hý die aarde omkeer!
 
 

 

 

 

Foto: U.S. Research.gov (gewysig)


 

 

 

 

 

 

 

 

 


 

.


Grillerig... maar so geweldig nuttig
 

Erdwurms

 

BO: Kyk by die venster uit. Sien jy ’n lap grond iewers? Hoeveel erdwurms, soos hierdie klompie, dink jy woon daar? Straks miljoene. Daar is al bereken dat daar onder ’n enkele vierkant aardgrond van 30 cm x 30 cm digby 25 erdwurms kan wees. En hoe waardevol is hulle nie! Hulle vreet hul pad deur die grond en verryk dit wonderbaarlik met hul uitskeidings. Boonop sorg hulle met hul grawery dat meer lug en water in die grond inkom en dit selfs ryker maak. Wat meer sê, hierdie oënskynlik eenvoudige skepseltjies is verantwoordelik vir byna al die vrugbare grond op aarde. Baie dankie dus vir alles wat jy vir ons beteken, jou grillerige, lae wurm!

Foto: PublicDomainPictures.net (detail)

E

 

Beeste voor ’n houtploeg in AfganistanTLIKE duisende jare gelede—met die uitvinding van die ploeg—is die aarde omgekeer. Dit was ’n omdolwing van die grond, maar ook ’n omwenteling in die wêreldgeskiedenis. Die mens se bestaan sou nooit weer dieselfde wees nie.
 
Al was die eerste ploeë nog heel primitief, het hierdie prakseersels wondere met die boere se gesaaides verrig. Die grond is losgemaak en belug, sodat suurstof en water kon binnekom om deur die plante benut te word.
 
Tog roem die mens verniet dat hy die ploeg uitgevind het.
 
In die negentiende eeu het die Britse natuurkundige Charles Darwin, wat ’n lewenslange studie van die erdwurm gemaak het, aangetoon dat hierdie eenvoudige diertjies ’n soortgelyke funksie as die ploeg verrig. (Ja, dis die einste Darwin van die evolusieteorie wat ook ’n erdwurm-kenner was.)

“Red wiggler”REGS: Hierdie soort erdwurm staan bekend as die “red wiggler”.

Foto deur Mihai Duguleana, wat dit tot openbare besit verklaar het (“released into the public domain”)


 

Met hul onophoudelike gedolwe maak erdwurms die grond los en belug dit. Meer nog: hulle voeg plantmateriaal by die grond, óf deur blare ondergronds te sleep wanneer hulle vreet óf met uitwerpsels in hul gate of op die grondoppervlak. Só word noodsaaklike chemikalieë weer in omloop geplaas.
 
Die natuur het nogmaals die mens voorgespring.

 

Wat is ’n erdwurm eintlik?

ERDWURM is die algemene naam vir die grootste lede van Oligochaeta (wat deur verskillende geleerdes as óf ’n klas óf ’n subklas beskou word) in die phylum Annelida, oftewel die gesegmenteerde wurms. Tot hierdie phylum behoort die klasse van die borselwurms, wat hoofsaaklik in die see woon; die bloedsuiers, wat in die see, vars water en op land voorkom; en die erdwurms, wat meestal landbewoners is.
 
Van die sowat 6000 erdwurmspesies kom slegs sowat 120 soorte wyd verspreid op die aarde voor. Hulle lewe ondergronds en verkies klam, humusryke grond. En die wurmbevolkings in die grond kan verstommend hoog wees. Na raming kan daar tot drie miljoen wurms—of drie ton—in minder as ’n halwe hektaar woudgrond lewe.
 
Dit kan piepklein wurmpies van minder as ’n halwe millimeter lank wees, tot Goliatte van tot drie meter.
 
In 1937 is ’n reus met ’n lengte van 6,7 m en ’n deursnee van 2 cm hier in ons eie land in die destydse Transvaal gevind—en, hoewel dit moeilik is om dit te bevestig, bly hierdie bielie bes moontlik steeds die langste erdwurm op aarde waarvan die lengte aangeteken is.

Uitwendige kenmerke van die erdwurm

BO: Uitwendige kenmerke van die erdwurm.

ONDER: Dwarssnee deur die liggaamsholte van die erdwurm.

Dwarssnee deur die liggaamsholte van die erdwurm

 

Bou van die erdwurm

EEN van die eerste dinge wat jy by die erdwurm sal opmerk as jy een van naby bestudeer, is dat sy liggaam in ’n aantal gelyke dele, of segmente, verdeel is. Die getal segmente verskil van spesie tot spesie.
 
Jy sal ook opmerk dat die een kant van die liggaam—die voorkant—by die einde gepunt is. Die einde van die ander helfte—die agterkant—is gerond.
 
Die punt aan die voorkant word gevorm deur ’n klein lob wat die prostomium genoem word, wat die brein bevat en die mond bedek.
 
Volwasse erdwurms word maklik uitgeken aan die swelling net voor die middel van die liggaam. Dit word ’n saaltjie of klitellum genoem en speel ’n belangrike rol in die voortplanting van die wurm (ondertoe word meer hieroor vertel).
 
Die hele liggaam word beskerm deur ’n dun kutikel, waaruit daar talle uiters klein haartjies of borsels (chatae) steek. Dié stel die wurm in staat om te seil en help ook tydens paring.
 
Die senustring loop langs die onderkant van die liggaam. Bloed word gesirkuleer deur vyf sogenaamde harte in die voorkant.
 
Die erdwurm is ’n regte blindemol! Dit is ’n “mol” omdat dit in die grond wroet en dit is blind deurdat dit geen oë of voelers het nie.  Sekere selle in die wurm se vel is wel gevoelig vir die ultravioletstrale van die son. Blootstelling aan sonlig verlam die wurm en maak dit uiteindelik dood.
 
Daar is ook klein reseptore wat gevoelig is vir chemikalieë, aanraking en trillings. Darwin, wat tot sy dood toe die erdwurm bestudeer het, het die wurms se sensitiwiteit vir vibrasies getoets.
 
Hy het ’n ry blompotte met erdwurms daarin op sy klavier neergesit. Wanneer hy sekere lae note gespeel het, het die wurms in hul gate verdwyn. Ander note het geen uitwerking op hulle gehad nie.

 

Die erdwurm ervaar sintuiglik sy lewe op ’n manier wat ek en jy ons glad nie eens kan voorstel nie.

 

BO: ’n Wurmhopie. Die uitwerpsels wat erdwurms agterlaat vanweë hul alewige vretery in die grond, maak die grond besonder vrugbaar.

 Tersaaklike deel van ’n oorspronklike foto deur
Muhammad Mahdi Karim (www.micro2macro.net),
wat dit op hierdie bladsy by Wikimedia Commons op die wêreldwye web gelisensieer het, onder meer ingevolge die Creative Commons Attribution ShareAlike 2.5-lisensie

Erdwurm-uitwerpsels


  

Fynproewers van grond

ERDWURMS neem voedsel op twee verskillende maniere in: hulle vreet óf blare wat hulle gedeeltelik in hul gate insleep óf, wanneer kos skaars is soos gedurende droë weer, grawe hulle gaatjies deur die grond te vreet en groot hoeveelhede daarvan in te sluk. Namate die grond deur hul liggame beweeg, onttrek hulle sekere voedingstowwe daaruit.
 
Party soorte wurms kom na die oppervlak om daar ontslae te raak van die grond wat hulle gevreet het. Die bekende wurmhopies word op hierdie manier gevorm. Ander raak ondergronds van die afvalstowwe ontslae.

 

Parende erdwurms

 

BO: Parende erdwurms.


Ter saaklike deel van ’n foto deurJackhynes”, wat dit tot openbare besit verklaar het (“released into the public domain”)
  

 

Hoe erdwurms aanteel  

ERDWURMS is hermafrodities (tweeslagtig), met ander woorde hulle het sowel manlike as vroulike geslagsorgane. Tog kan ’n erdwurm nie self die eiers bevrug wat dit voortbring nie en is ’n maat vir aanteling nodig. Die testis en ’n opening vorm die manlike orgaan, terwyl ovaria, eierleiers en ’n opening die vroulike orgaan uitmaak. Daarbenewens het hulle spermasakkies, waarin die sperma van die maat opgevang word..

 

Ná die paring en ’n ruk nadat elk van die erdwurms weer hul eie gang gegaan het, ontstaan daar ’n slymband by die saaltjie (kitellum). Die erdwurm kruip agteruit uit die slymband, wat meebring dat die eiertjies en die sperma in die slymband beland. Aan die einde van die proses wanneer die wurm uit die slymband glip, sluit die slymband en vorm dit ’n kokon. Nuwe wurmpies kruip ná enkele weke uit die kokon en ná nog ’n paar weke kan hulle hulle onderaardse lewe as volgroeide erdwurms aandurf.

 

Erdwurmkokonne

 

BO: Erdwurmkokonne.

Foto: Clive A. Edwards, The Ohio State University, Columbus / U.S. Department of Agriculture


Hoe erdwurms beweeg  

’N ERDWURM beweeg met golwe van spiersametrekking en
-ontspanning—ál met die lengte van sy liggaam langs—sodat ’n bepaalde gebied óf gerek en dun óf verkort en verdik is.
 
Al lyk erdwurms vir ons glad, is daar op die liggaam talle uiters klein haartjies, of chatae, wat die wurm in staat stel om hom goed aan die grond of die wande van sy gat te anker.
 
Beweging van die erdwurmBy  A  op die illustrasie REGS lê die erdwurm uitgestrek. Vir posisie  B word die kopkant deur die haartjies geanker terwyl die stertkant  ingetrek word. Die erdwurm strek homself daarna na posisie  C  deur in sy geheel vorentoe te beweeg. Sou dit agtertoe wil beweeg, doen dit dieselfde bewegings met die haartjies vorentoe gestrek.
 
Die grond word deur erdwurms binnegedring deurdat hulle hul voorste punte in enige openinkies tussen gronddele indwing en dit groter maak. As die grond baie kompak is, vreet die wurms hul pad daardeur.
 

Die ondergrondse stryd

ANDERS as by insekte is die kutikel van die erdwurm dun en deurdringbaar. Dit laat suurstof deur vir asemhaling en laat koolsuurgas vry, maar doen weinig om waterverlies te keer of die diertjie teen die son te beskerm. Om dié rede moet erdwurms bedags in klam grond bly. Party prop die openinge na hul gate met gras, stokkies en klippies toe.
 
Daar word slegs snags na kos gesoek, wanneer die vogtigheidsgraad hoër is. Hulle kom selde heeltemal uit hul gate.

Gedurende droogtes onttrek baie soorte hulle tot in die klam ondergrond. Ander soorte oorleef deur in ’n klein met slym uitgevoerde kompartementjie onder die aarde op te krul.
 
Soos met talle ander bewoners van die natuur, hetsy op land, in vars water of die see, is die ondergrondse bestaan van die erdwurm ’n voortdurende drama van lewe en dood.
 
Voëls trek hulle uit hul gate uit met hul lang, dun snawels. Hengelaars grawe hulle uit om as aas te gebruik. Selfs die boer met sy ploeg—einste hy wat die erdwurm met sy grondomdolwery kom naboots het—is ’n geswore vyand.
 
Die arme, stomme, lae wurm...

 

’n Oranje gesegmenteerde wurm van die see

BO: Jy sou dit nie sê nie—of miskien bemerk jy tog ’n vae ooreenkoms—maar hierdie oranje gesegmenteerde wurm van die see is verwant aan die erdwurm.

 

Foto: Charleston Bump Expedition 2003 / NOAA Office of Ocean Exploration / Dr. George Sedberry, South Carolina DNR, Principal Investigator

Klik hier om terug te keer na die inhoudsblad