’n Laslappie van Mieliestronk

BLOMME:

Plante in hul fleur!

Foto: NASA Astrobiology Institute / NASA

REGS: ’n Heuningby en ’n kolibrie (soort suikervoëltjie) by blomme. Dit is ’n saamgestelde foto en die by en voëltjie is vanselfsprekend nie volgens skaal nie. Albei is egter bestuiwers van blomme deurdat hulle met hul nektarsoekery stuifmeel oordra.

Foto van kolibrie: Digital Library System / U.S. Fish & Wildlife Service (gewysig)

DIT is een van die wonderlikste verbintenisse in die ganse skepping— dié tussen blomdraende plante en insekte. Bye, vlinders, vlieë en muskiete vlieg van blom tot blom en bestuif dit met stuifmeel (geel blompoeier) sodat die plante kan vermenigvuldig. Op hul beurt bied die plante nektar—’n soet vloeistof in hul blomme—aan die insekte.

Ander diere, soos suikerbekkies (heuningvoëltjies) en vlermuise, drink ook die nektar van blomme en dra in dié proses stuifmeel oor.

Blomme is die voortplantingsorgane van plante. In ’n blom is daar die stamper (vroulike voortplantingsorgaan) en die helmknop met stuifmeel aan die meeldraad (manlike orgaan). By kruisbestuiwing word die stuifmeel in die helmknoppe van ’n blom deur insekte, ander diere of die wind na die stamper van ’n ander blom oorgedra, waarvandaan dit na die vrugbeginsel beweeg om by die saadknoppies uit te kom. Net dan sal saad gevorm word.

Sekere bestuiwende insekte, soos motte, vlieg snags, terwyl ander, soos vlinders en bye, in die dag vlieg. Verskillende soorte blomme is hiervolgens toegerus: party gee hul geur net in die nag af, terwyl ander dit bedags doen.

Klik hier om terug te keer na die Laslappie-bladwyser

Klik hier om terug te keer na die inhoudsblad