Little Boy, die eerste kernbom wat in ’n oorlog gebruik is... met verskriklike gevolge...

 Little BoyBO: Die kernbom met die skrynend ironiese kodenaam Little Boy. Sy lading van slegs ’n handvol uraan omtrent so groot soos ’n appel het derduisende mense na hul graf gestuur, terwyl die oorskot van andere nooit gevind is nie. Daar word gereken dat die liggame van dié wat te naby aan die middelpunt van die ontploffing was, weens die geweldige hitte doodeenvoudig verdamp het.

“Klein seuntjie”
wat ’n hele stad verwoes het

 Hirosjima ná die kernontploffing
  
BO: Die Japanse stad Hirosjima ná die kernontploffing. Dit is plek-plek so te sê met die grond gelyk gemaak.

Foto’s van diverse bronne, meestal die Amerikaanse departement van verdediging (USDoD) of verwante regeringsinstansies en dus openbare besit

Lees ook:
•  
Radioaktiwiteit: die menseredder en die bose moordenaar
•   Atome: die raaiselagtige struktuurtjies van super-energie

I

N die donker oggendure van 6 Augustus 1945 verlaat die Amerikaanse B-29-bomwerper Enola Gay die aanloopbaan op die Oseaniese eiland Tinian in die Stille Oseaan. Die vlieënier is kolonel Paul Tibbets. Hy dra ’n geweldige geheim met hom saam—omtrent ’n komende gebeurtenis wat die gang van die geskiedenis dramaties gaan beïnvloed.

Sowat vier uur nadat hulle opgestyg het, verklap Tibbets aan sy spesiaal opgeleide bemanning waarheen hulle onderweg is en wat hulle daar gaan doen. Op die vliegtuig is die wêreld se eerste atoombom wat in ’n oorlogsituasie ontplof gaan word, verneem die manne. En hul teiken is die Japanse stad Hirosjima.

Die stad met sy nagenoeg 350 000 inwoners lê in die suidweste van Japan se grootste eiland. Tot dusver was dit nog die enorme bomaanvalle gespaar wat deur die Amerikaanse magte teen Japan geloods is—alles in ’n verbete poging om die onversetlike Japanners hier in die Tweede Wêreldoorlog tot oorgawe te probeer dwing.

Tibbets en sy manne se uittog na Hirosjima verloop sonder enige Japanse optrede om die vlug te probeer keer.

Die kernbom, met die skrynend ironiese kodenaam Little Boy, word gereed gemaak om op die stad afgegooi te word. Die Enola Gay bereik die stad om 7:25 vm. en vlieg op ’n hoogte van sowat 8000 meter. Om 8:16 word die bom gewerp en dan ontplof dit omtrent 600 meter bokant die grond. ’n Verblindende lig omgeef die manne terwyl die vliegtuig ’n skeep draai maak om aan die ontploffing te ontkom.

Met beskermende brille kyk Tibberts-hulle terug na waar hulle die bom gegooi het. Hulle sien hoe ’n onheilspellende paddastoelvormige wolk in die bo-lug uitkrul.

Hirosjima lê verwoes.

Die skade... die lyding op die grond.. dis onbeskryflik. Mense wat naby die middelpunt van die ontploffing was, het na alle waarskynlikheid eenvoudig verdamp by ’n temperatuur wat glo miljoene grade Celsius was. Baie is dadelik dood of sou nog sterf weens die gesamentlike uitwerking van onder meer brand- en stralingswonde, trauma, infeksie en stralingsiekte. Nog later sou leukemie en ander kankers verdere lewens eis.

•  Ná die oorlog het die opperbevel van die Geallieerde Magte geraam dat 129 558 mense weens die Hirosjima-ontploffing gedood is of beseer was of vermis geraak het. Tog was dit nie genoeg om die Japanse leierskorps te laat oorgee nie. Selfs ’n tweede kernaanval drie dae later op die Japanse stad Nagasaki het nie die vyandelikhede dadelik beëindig nie. Eers op 14 Augustus het Japan tot ’n onvoorwaardelike oorgawe ingestem.

Kol. Paul Tibbets in sy bomwerper, die Enola GayDie paddastoelwolk bokant Hirosjima

 
LINKS BO: Kol. Paul Tibbets in sy bomwerper, die Enola Gay, waarmee hy en sy bemanning die bom op Hirosjima gaan gooi het. Ondanks die hewige bombardering van 67 Japanse stede oor ’n tydperk van ses maande het Japan steeds handnekkig geweier om bes te gee. Pres. Harry S. Truman van die VSA het toe min of meer as laaste uitweg die kernaanvalle op die Japanse stede Hirosjima en Nagasaki gelas. Dit was die enigste aanvalle nog met kernwapens in die geskiedenis van oorlogvoering—en dit lyk of dit alle regdenkende mense tot besinning geskok het oor die ware verskrikking van kernbomme.

 

REGS BO: Die paddastoelwolk wat as gevolg van die ontploffing bokant Hirosjima uitgekrul het.

 Hirosjima vandag

BO: Hirosjima vandag, ’n stad met moderne geboue. Maar links op die foto herinner die Hirosjima-vredesgedenkteken of “Atoombomkoepel” jou aan ’n tyd toe die mens die ontsettende kragte van die atoom ingespan het om te vernietig. Die atoombom het feitlik reg bokant die koepel (op ’n hoogte van 600 meter) ontplof.

Foto: Hirotsugu Mori,
wat dit op hierdie bladsy by Wikimedia Commons op die wêreldwye web gelisensieer het ingevolge die GNU Free Documentation-lisensie en by uitbreiding die Creative Commons Attribution ShareAlike 3.0-lisensie, waarkragtens hergebruik op sekere voorwaardes vergun word

ONDER: Die ligging van die twee Japanse stede wat in die Tweede Wêreldoorlog met kernbomme verwoes is.

Paddastoelwolk oor Nagasaki

Die ligging van die twee Japanse stede wat in die Tweede Wêreldoorlog met kernbomme verwoes is
REGS BO: Die kenmerkende paddastoelwolk, dié keer oor Nagasaki. Die plutoniumbom wat dit veroorsaak het, se kodenaam was “Fat Man”. Die ontploffing het binne die eerste twee tot vier maande van 60 000 tot
80 000 sterftes veroorsaak, nagenoeg die helfte daarvan reeds op die eerste dag.
   

 Nagasaki verpletter

BO: Die beelde van ’n verwoeste tempel op die voorgrond en ’n kaal geveegde landskap daaragter illustreer diep treffend hoe Nagasaki deur die kernbom “Fat Man” verpletter is.

Klik hier om terug te keer na die inhoudsblad